Технологияны пайдаланууда ата-эненин ролу

Уюлдук телефон алууну максатка ылайык тандоо керек. Балаңызга өтө кымбат, көптөгөн функцияларды ичине камтыган чөнтөк телефон алуунун зарылчылыгы жок. Ала турган болсоңуз кабарлашууга жарактуу гана телефон алыңыз. Уюлдук телефонун колдонуу үчүн сөзсүз түрдө баланын жаш курагын чектеп коюу да туура болбойт. Телефонду белгилүү куракка жеткенден кийин белгилүү эрежелер менен колдонгонго уруксат берип, аны көтөрө билүү деңгээлин байкап көрүү керек. Эгерде ал ар дайым уюлдук телефонун колунан түшүрбөй жүрсө, бүткүл убактысын аны менен гана өткөрүп жаткан болсо, демек ал телефонду колдонуунун деңгээлине жете элек. Балаңыз чөнтөк телефонду керек болгондо, муктаждык болгондо гана колдонуп, башка убактарда аны менен алектенбесе, демек ал телефонду туура колдонууну үйрөнгөн болот. Уюлдук телефондон чыккан толкундар ден соолукка зыяннын тийгизерин да унутпаңыз. Сиздин балаңыз 6-7 жашынан баштап ар күнү 3-4 саат телефон колдонсо, бул багытта айыкпас дартка чалдыгуусуна жол ачышы мүмкүн. Ошондуктан балдарга телефон колдонууну чектеп, туура колдонууга үйрөтүү керек.