Шиириет-инсаниетнинъ юксек маневий зенгинликлерининъ бири сайылмакъта.

Бедий эдебият, шу сырада шиириет, инсаниетнинъ юксек маневий зенгинликлерининъ бири сайылмакъта. Бедий эдебият белли бир миллетке менсюп олып, онынъ тарихыны, аят тарзыны, кечмишини ве келеджекке умютлерини, урф-адетлерини, дюнья бакъышларыны акс эте. Бедий эдебият бир тарафтан халкънынъ аятынен багълы олып, дигер тарафтан белли бир эсернинъ яратыджысы – шаир я да языджынен багълыдыр. Эсернинъ яратыджысы белли бир девирде яшап, эр алда этрафта, джемиетте, девлетте, миллий ве озь шахсий аятта олып кечкен вакъиаларны тасвир эте.

Халкъымызнынъ тарихында къара саифе олгъан сюргюнлик фаджиасы шиириетте ве умумен эдебиятта ич бир вакъыт силинмейджек корюмли излер къалдыргъандыр. 1944 сенеси майыс 18 куню бутюн халкъымыз асырларнен яшагъан ана топрагъындан сюргюн этильди.

Халкънынъ тарихы ве тарихте олып кечкен вакъиалар шаир ве языджыларнынъ иджадында озь аксини тапалар. Биримджесине, эр бир къырымтатар эдипнинъ иджадында «Ватан», «Ватанперверлик», «Сюргюнлик» мевзусына багъышлангъан парлакъ эсерлер тапмакъ мумкюн.