Демид Константинович Курочкин - Элпанур ялын талантше

Демид Константинович Курочкин 1928 ийыште Параньга район Элпанур ялыште шочын. Изи годсек колхозышто пашам ышташ логалын. Элпанур школым тунем пытарымек, Мари – Билямор педагогический училищыш тунемаш пура. Окса чудылыклан кора тунеммым кудалта да ялышке портылеш. Демид Константиновичым Элпанур сельсоветыш секретарьлан налыт. Тиде паша гыч Совет Армий радамыш кая. Шым ий жапыште Венгрийыште, Румынийыште, Польшышто, Чехийыште служитлаш логалеш.

Йошкар – олаште культпросвет училищым тунем пытарен. 1952 ийыште Санкт – Петербургысо И.Е.Репин лумеш художественный академийыш тунемаш пураш точен, но конкурс почеш эртен огыл. Йошкар - олашке портылеш да тыштак илаш туналеш. Культур министерствыште, республикысе краеведческий музейыште, а варажым Марий книга издательствыште художественный да технический редактор должностьышто пашам ышта. «Электроавтоматика» заводыштат художник – сорастарышылан тыршаш логалеш.

Демид Курочкин – поэт да художник. «Шочмо ялем», «Лыжга мардеж», «Кож», «Омо лугыч», «Серыш», «Шужарем», «Станок воктене удыр» да тулеч моло почеламут – влак дене, «Сабантуй» поэмыж дене палыме. Возымыжо «Ямде лий», «Рвезе коммунист», «Марий коммуна» газетеш, «Ончыко» журналеш савыкталтыныт.

Дмитрий Кульшетов «Ий умбалне вальс» почеламутшылан семым возен.

Демид Константиновичын «Шыже», «Теныз», «Кум куэ», «Марий суан» да тулеч моло суретше – влак улыт.

Демид Курочкин 10 июнь 1969 ийыште колен.