Տարրական դպրոցի դասարանի ղեկավարի` դաստիրակչական աշխատանքների օրինակելի պլան

ՏԱՐՐԱԿԱՆ ԴՊՐՈՑԻ ԴԱՍԱՐԱՆԻ ՂԵԿԱՎԱՐԻ`

ԴԱՍՏԻՐԱԿՉԱԿԱՆ ԱՇԽԱՏԱՆՔՆԵՐԻ ՕՐԻՆԱԿԵԼԻ ՊԼԱՆ

Տարրական դպրոցում դասարանի ղեկավարը` դասվարը`

• դաստիարակչական աշխատանք է կատարում իր դասարանի սովորողների շրջանում` սերտորեն համագործակցելով մյուս մանկավարժական աշխատողների հետ.

• նպաստում է հանրակրթական դպրոցի և ընտանիքի մանկավարժական միասնական պահանջների ապահովմանը սովորողների նկատմամբ.

• անհրաժեշտության դեպքում սովորողների համար կազմակերպում է ուսումնական օգնություն.

• իրականացնում է դասարանի համար սահմանված գործավարությունը, հանրակրթական դպրոցի տնօրինությանը ներկայացնում սովորողների առաջադիմության, հաճախումների և վարքի մասին տեղեկատվություն.

• կազմակերպում է սովորողների առողջության ամրապմդմանն ու ֆիզիկական զարգացմանը նպաստող միջոցառումներ, մրցույթներ, նպատակային էքսկուրսիաներ, շրջագայություններ և այլ միջոցառումներ.

• հանրակրթական դպրոցի մանկավարժական խորհրդի քննարկմանն է ներկայացնում սովորողին կարգապահական տույժի ներկայացնելու հարցը.

• արգելում է սովորողների, ուսուցիչների և ծնողների այն նախաձեռնությունները, որոնք

կարող են սովորողի առողջության, կյանքի վտանգ պարունակող, ինչպես նաև խաթարել ուսումնադաստիարակչական աշխատանքների իրականացումը:

Աշխատանքային պլանը կազմելիս պետք է`

ա/ Ներկայացնել դասարանի ընդհանուր բնութագիրը

• աշակերտների ընդհանուր քանակը/աղջիկ, տղա/

• աշակերտների և նրանց ընտանիքների սոցիալական վիճակը,

• տվյալներ նրանց առողջության և ֆիզիկական զարգացման մասին,

• ճանաչողական հմտություններ (ուշադրության, հիշողության, պատկերացման, մտածողության առանձնահատկություններ),

• զգացմունքակամային և պահանջարկամոտիվացիոն շրջանակներ (անհատի ուղղվածությունը, հետաքրքրությունները, հարաբերությունները, արժեքային համակարգը),

• աշակերտների վարքը, արարքները:

• աշակերտների գիտելիքների մակարդակը,

• հոգեբանական և սոցիալական զարգացման մակարդակը, որը համապատասխանում է ուսումնադաստիարակչական գործընթացի երեք ֆունկցիաներին. ուսուցանող, դաստիարակող և զարգացնող:

• Դրանից բացի՝ դասղեկը/մանկավարժը/ ուսումնասիրում է դասարանը որպես խումբ, կոլեկտիվ. դասարանում միջանձնային հարաբերությունները, համախմբվածությունը, հասարակական կարծիքը, արժեքների միասնականությունը և այլն…

• Հարցաթերթերի և այլ հարցման մեթոդների միջոցով հնարավոր է հավաքագրել տարբեր տեղեկություններ՝ աշակերտների գործունեության դրդապատճառների, անհատական որակների և արժեքային կողմնորոշումների մասին: Հարցաթերթերը լինում են բաց (աշակերտը ազատ ընտրում է պատասխանը) և փակ (պետք է ընտրել տրված պատասխաններից որևէ մեկը): Հարցաթերթի կազմումը բարդ աշխատանք է:

բ/ Նախորդ տարվա աշխատանքային պլանի համառոտ վերլուծությունը,

գ/ Հիմնախնդիրներ, որոնք հրատապ լուծման կարիք ունեն,

դ/ Նոր ուսումնական տարվա աշխատանքային պլանի նպատակը և խնդիրները:

ե/ Աշխատանքային պլանի կազման հիմնական ուղղությունները /կազմակերպչական աշխատանք, աշխատանքային դաստիարակություն, գնահատող-կողմնորոշող գործունեություն և ազատ շփում, անվտանգ երթևեկություն, աշխատանք ծնողների հետ, առողջ ապրելակերպ, ես քաղաքացին եմ Հայաստանի/ :

ԴԱՍՂԵԿԻ ԱՇԽԱՏԱՆՔԱՅԻՆ ՊԼԱՆ`

ԸՍՏ ՆԱԽԱՏԵՍՎԱԾ ՀԻՄՆԱԿԱՆ ՈՒՂՂՈՒԹՅՈՒՆՆԵՐԻ

Փաստաթղթերի ցանկ, որոնք ստեղծվում, լրացվում և վարվում են

դասղեկի կողմից

1. Դաստիարակչական գործունեության պլան`

-Միջոցառումների համալիր ծրագիր, որտեղ ներկայացված են դաստիարակության բոլոր ուղղություններով իրականացվող աշխատանքները,

- Միջոցառումների օրացուցային պլան:

1. Ուսուցիչների հետ համագործակցային աշխատանքի պլան:

2. Դասրանի սոցիալապես անապահով երեխաների ցուցակ և աշխատանքների պլան:

3. Դասալսումների մատյան` դասի վերլուծության վերաբերյալ գրառումներ ուսուցչի հետ համատեղ:

4. Ծնողական ժողովների անցկացման պլան / թեմատիկա և ժամանակացույց/:

5. Ամենօրյա աշխատանքների կատարման գրանցումների մատյան:

ԿԱԻ-ի Արագածոտնի մասնաճյուղի մասնագետ` Ս. Մուսայելյան

Դասղեկի ընդհանուր բնութագիրը

1. Դասղեկի բարեկրթության չափանիշ է հանդիսանում նրբանկատությունը, ի հակադրություն կոպտության, աննրբանկատության:

2. Դասղեկը պետք է լինի խիստ, բայց բարի և անաչառ:

3. Եթե դասղեկն ուզում է, որ իրեն հարգեն, առաջին հերթին ինքը պետք է հարգի ուրիշների արժանապատվությունը:

4. Նախքան ուրիշներից ուշադրություն պահանջելը, դասղեկն ինքը պետք է ուշադիր լինի իրեն շրջապատողների հանդեպ, հասկանա նրանց շահերը, կարիքներն ու պահանջները:

Պետք է ունենա

1. Ներքին ազատություն

2. Մտածելակերպի, վարքի ազատ ընտրություն

3. Սեփական արարքների հնարավոր հետևանքների համար լիարժեք պատասխանատվության գիտակցում

Պետք է կարողանա

1. Պլանավորել իր մասնագիտական գործունեությունը

2. Վերլուծել և կանխատեսել իր գործունեության արդյունքները

3. Աջակցել յուրաքանչյուր աշակերտի` որպես անհատ ձևավորմանը

4. Աշակերտներին սովորեցնել վերլուծել իրենց արտաուսումնական գործունեությունը

5. Կապեր հաստատել աշակերտների ծնողների, առարկայական ուսուցիչների և հասարակության հետ

Ինչն է ամենակարևորը դասղեկի համար` երեխաների հետ շփման մեջ

• Բարությունը (իհարկե բարությունն առանց պահանջկոտության` թակարդ է մանկավարժի համար, բայց պարզվում է, որ երեխաների համար դա դասղեկի ամենակարևոր հատկանիշն է: Գուցե երեխաները հոգնե՞լ են անդադար վերահսկումից և պահանջներից, և նրանց պետք են պարզ մարդկային զգացումներ),

• ուշադրությունը,

• հոգատարությունը

• իրենց հասկանալը,

• կարեկից, արձագանքող վերաբերմունքը,

• շփման համար բաց լինելը,

• բարեհամբույր լինելը,

• պատասխանատվությունը,

• մարդասիրությունը,

• անկեղծությունը,

• հումորի զգացումը,

• լրջությունը,

• հավասարակշռվածությունը,

• արդարամտությունը,

• նպատակասլացությունը,

• ժամանակակից լինելը:

Ինչն է ամենակարևորը դասղեկի համար` ծնողների հետ շփման մեջ

• ազնվությունն ու արդարամտությունը

• համբերատար լնելը

• հանգստությունը

• բարեկրթությունը

• նրբանկատությունը

Դասղեկ լինել` նշանակում է.

• մեծ պատասխանատվություն կրել,

• կարողանալ լսել և հասկանալ,

• հոգ տանել դասարանի յուրաքանչյուր աշակերտի մասին` նրա հոգեկան, ֆիզիկական և բարոյական վիճակի մասին,

• աջակցել (ուսման, դասարանի, ծնողների և շրջակա սոցիումի հետ շփման մեջ, ինքնաբացահայտման և ինքնազարգացման մեջ),

• ղեկավարել և կարգուկանոն պահպանել,

• փոխարինել ծնողներին, ավագ ընկերոջը (եթե դրա կարքը կա),

• արդարամիտ լինել:

Խորհուրդներ դասղեկին

• Հիշեք, որ յուրաքանչյուր երեխա իր հետաքրքրությունները, ուրախություններն ու տխրությունները` իր ներաշխարհն ունի, կպչուն մի եղեք:

• Քանի դեռ ճշմարտությունը չեք պարզել, հանգստություն պահպանեք:

• Մտեք երեխայի դրության մեջ, փորձեք հասկանալ, թե ինչ է նա զգում, հետո նոր միայն որոշեք` ինչ անել:

• Լավ ու բարի արարքներ գործեք, նրանք մեզանից են սովորում:

• Այնպես արեք որ երեխայի համար հաճելի լինի ձեզ հետ շփվելը. գովեք, ընդգծեք հաջողությունները, ոգեշնչեք նրան:

• Ավելի շատ ինքնուրույնություն և ընտրելու իրավունք տվեք:

• Ուշադիր եղեք: Չափավորեք ձեր սպասելիքները, մի մոռացեք, որ նրանք այնուամենայնիվ դեռ երեխա են:

• Խուսափեք մեղադրելուց:

• Մի° մեծամտացեք: Ընդունեք, որ դուք էլ ինչ-որ բան չգիտեք:

• Մի° սահմանափակեք ձեր երևակայությունը, մի° վախեցեք անսովոր երևալուց:

• Մի° համեմատվեք այլ ուսուցիչների հետ: Փոխարենը համեմատեք ինքներդ ձեզ` երեկ և այսօր:

9