Т?рбие са?атыны? та?ырыбы: «Ана – ?н Бала оны? ?айырмасы» 7 «а» сыныбы ?зірлемені ??растыр?ан: 7 «а» сынып о?ушысы - ?ызырова Аружан

Тәрбие сағатының тақырыбы: «Ана – ән

Бала оның қайырмасы»

7 «а» сыныбы

Әзірлемені құрастырған: 7 «а» сынып оқушысы - Қызырова Аружан

Тәрбие жұмысының мақсаты: Балаларды мейірімділікке, аналардың өлшеусіз еңбегін бағалай білуге үйрету. Анасын сүю арқылы еліне, жеріне деген сүйіспеншілігін арттыру. Оқушылардың танымдық және шығармашылық қабілетін, эстетикалық талғамын, шеберлігін дамыту. Өнерді тануға, қызығушылыққа баулу, әдептілікке, парасаттылыққа тәрбиелеу.

Аружан:

Көктем келіп құлпырды айналамыз

Аруларды мадақтап ән саламыз

Барша аналар күнінде бүгін біздер

Аруларды қол соғып қарсы аламыз

Диляра:

Армысыздар аяулы аналар, ардақты ұстаздар, қадірменді қонақтар. Баршаңызды 8-наурыз Халықаралық Аналар Күнімен құттықтаймыз.

Аружан:

Ана әрбір адамның жарық дүниедегі ең жақыны, жанашыры, қадірлісі, қамқоршысы. Ақ сүтін беріп аялаған, жанын да беріп аямаған ардақтысы. Кез-келген адамның әдептілігі мен жандүниесінің сұлулығы ең алдымен балаға ақ сүтін беріп, әлпештеп өсірген ана жылуынан басталады. Бала бойындағы ең жақсы қасиеттер бізге алдымен анадан тарайды. Көктем табиғаты мен жымдасқан жылылық, шексіз мейірімділік дүниеге жаңа келген тіршілік иесіне нұрын шашып, келешекке ақ жол, адал ниет нұсқаушы, асқақ құдірет иесі ол – ана.

Диляра:

Ана деген аяулы жан, асыл жан

Ана қымбат алмас, гауһар тасыңнан

Мейлі жина бар байлықты, бірақ ол

Түкке тұрмас сипаса анаң басыңнан

Бүгінгі мейрам ерекше. Бүгін біз үшін әрдайым орны бөлек, мейірімі шексіз асыл жандар мерекесі, асыл аналар мерекесі.

Аружан:

Ана туралы ән шырқамаған әнші, өлең арнамаған ақын жоқ шығар сірә. Ендеше келесі кезекті ана туралы әнге берейік.

Анаға арнап бүгін біз ән шырқайық

Өнерліге тамсанып, қол соғайық

Ана жайлы әнімен ортамызға

Базарханов Әлиді шақырайық

Диляра:

Ана теңіз болса, бала ойнақтаған толқын. Ана аспан болса, бала төсіндегі жұлдыз. Ана жеміс ағашы болса, бала оның жемісі. Ана мен бала бір-бірінен ажырату мүмкін емес егіз ұғым.

Аружан:

Иә, расымен, ана мен баланың бір-біріне деген жақындығын, сүйіспеншілігі мен қамқорлығын ешкім жоққа шығара алмайды. Ана өмірінің мәні баласында, ал, бала бақытының кілті – анасының күлкісінде. Ана қуаныштан көзіне жас алса, көктен періште күлімдегендей болады. Ал, ана қайғыдан жыласа, бала алаулап тұрған отта қалғандай күй кешеді.

Диляра:

Шынымен, ана бақыты әлемдегі ең қымбат қазына. Ендеше, келесі кезекті аяулы аналарымыздың бақыты жайлы әнге берейік. Ортаға Ақболатова Айымды шақырамыз, ана әнімен.

Аружан:

Ана деген асыл жандар болаттай

Ана деген мөлдір жандар бұлақтай

О, адамдар, қадірлей біл ананы

Ақыл-ойды жат қылыққа тонатпай

Диляра:

Әйел – әлемнің тірегі. Әйелге бәрі жарасады. Қыз атаулының жаны таза, өнері шексіз. Енді, қыздарымыздың тағы бір өнерін тамашалайық. Ортаға өз билерімен баршаны тамсандырып жүрген кербез мінезді, «Кербез» тобын шақырамыз, қарсы алыңыздар!

Аружан:

Сұлу әлем, әлем сұлу сен жаратқан адаммен

Көк жолының қарсылығын қағып тастап барам мен

Сендік қуат болар бәлкім, басын иді көк маған

Әркез сенен туғанымды есіме алсам тоқтаман, дей отыра анадан асқан сұлу жоқ екенін айтқым келеді. Аналарымыз бар әлемдегі сұлулықтың бейнесі. Бүгінгідей аруларды ардақтайтын күнде ұлдарыңыз сіздерге ерекше сый сыйламақшы. 7А сынып ұлдарының сән шеруін тамашалаңыздар.

Диляра:

Анашым, асыл анам, есіл анам

Елжіреп есіркеймін, есіме алам

Мен үшін сен суалтқан ақ сүтіңді

Ақтамасам боп жүрмін несіне адам, - дей отыра сыныбымыздың өнерлі қыздарын ортаға шақырайық. Қарсы алаңыздар, сахнада «Арулар» тобы, «Асыл Ана» әнімен.

Аружан:

Арманыңды ақтармын ба жүрегімді тербесем

Айға сіңлі, қарындассың қасиетті жерге сен

Мен өзіңді теңдесі жоқ құдірет деп түсінем

Сендік қуат мың есе артық жердің тарту күшінен

Диляра:

Ортаға мың бұралған биші қыздарымызды шақырамыз. «Кешью» тобы қуыршақтар биімен.

Аружан:

Ана керек о, адамдар, ана керек адамға

Анасыздар кім сияқты күн кешіп жүр ғаламда

Пікіріңді ұнатпаған таптық та дер дананы

Даналықтың қажеті жоқ сыйлау үшін анаы, - дей отыра «Аюми» би тобын заманауи бимен шақырамыз.

Диляра:

Білмедім, сен әйтеуір ораласың көп тілге

Киелі сүт құдіретімен әлде есейіп кеттім бе

Ана десе әйтеуір мен өзге сөзді есітпен

Құлағыма үн келеді қоңыраулы бесіктен, деп ортаға сыныбымыздың оқушыларын аналарына сыйлықтарын табыстау үшін шақырамыз.

Аружан:

Адам -адам болғыс келсе, алдымен ананы қастерлей білуі керек. Өмірде ана алақанының қызуы мен әке-шеше мейірімін тоя жеген тамақ та, шипасы күшті дәрі де алмастыра алмайды.

Ана - үйдің берекесі, қыз баланың өнегесі, шаруаның несібесі. Ананың көзінен нұр төгіліп, жан-жағына шуағын төгеді. Осы шуақпен жылынып, асыл ананың құшағында мейір алып жүрген біз, алтын ананы мәңгі қатерлеп, еңбегін бағалап өтейікші. Осымен, мерекелік концертіміз аяқталды. Келесі кездескенше қош-сау болыңыздар.