Сыда ц1ыфыр зыгъэдахэрэр

                   Сыда ц1ыфыр зыгъэдахэрэр       Адыгагъ… Гупшысэ ин хэлъ, мэхьэнэшхо и1 а гущы1эм. Лъэпкъыр дунаим щыпсэунэу зыригъэжьагъэм къыщыублагъэу иныбжь къалъытэ. А гущы1эм епхыгъ ц1ыфэу агъэлъап1эу, шъхьэк1эфэныгъэшхо зыфаш1эу лъэпкъым къыхагъэщырэм тегущы1эхэ зыхъук1э ,,адыгэгъэшхо хэлъ, ц1ыфыгъэ ин хэлъ, гук1эгъушхо хэлъ” зэра1орэм. Гукъау нахь мыш1эми, адыгагъэм щыщэу, ащ епхьыл1энэу тэ, адыгэ лъэпкъым, непэ къытхэнэжьыгъэр мак1э. Тиадыгэ шъошэ- шэпхъэ гъэнэфагъахэр тэ къэтыумыхъумэжьэу, зэтымыпэсыжьмэ , зыми ахэр къытипэсыщтэп, ар хэтк1и гъэунэфыгъахэу щыт. Егъаш1эм адыгэ лъэпкъым гук1эгъур къебэк1эу, тхьамык1эм, зигъуаджэм, амалынчъэм, жъы хъугъэхэм шъхьэк1эфэшхо афаш1ызэ къахьыгъ. Жъыгъор агъэлъап1эу, ар упч1эжьэгъу аш1эу, ы1орэр  якъабылэу агъэцак1эу щытыгъ.     Уныбжьэк1эмэ жъыр ары узымыгъэгъощэщтыр. Уц1ыфымэ узгъэдэхэщтыр унапэ изэхэлъык1э закъор, щыгъын дахэу пщыгъыри арэп, уизэхэш1ык1, уи1эдэбныгъ, угу икъэбзагъ.     Тилъэпкъ ылъапсэ къызщежьэрэр ыбз, ихабз, игук1эгъу, изэфэныгъ, иц1ыфыгъ зек1уак1э,  ипсэук1э-зэхэтык1. Уасэ нэмык1 ц1ыф лъэпкъхэм  къытфязыгъэш1ыщтыгъэр джащ фэдэу дэхагъэ, ш1угъэ, ц1ыфыгъэ лъэпкъым  ижъык1э хэлъэу  къызэрихьыжьыщтыгъэр ары.      Ц1ыфыр зыгъэдахэрэр изек1ок1э-гъэпсык1, ижабз, и1эдэбыныгъ. Хъулъфыгъэми  бзылъфыгъэми  ыныбжь  икъоу   ц1ыфмэ  ахахьэу  зыхъук1э, ар  зыфэдэ  ц1ыфыр  къэош1э. Ц1ыфэу  унэгъо  зэгуры1ом  къихъуагъэу, ныжъ-тыжъмэ  ягъэсэпэдхыдэ  зынэсыгъэр  дэи  хъун  ылъэк1ыщтэп.  Ащ  фэдэ  ц1ыфыр  адыгагъэм  къыдилъытэрэ  шэн-хабзэхэм  арыгъозэщт, адэхыщтэп. Щыгъын   дахэ пщыгъэу, ау  къып1эк1ахьэрэр къап1оу, пш1э зыхъук1э, дахэк1э пц1э ра1ощтэп.      Дэхагъэр  зыхэмылъ  щы1эп: гущы1ак1эми, уцук1эми, т1ысык1эми, нахьыжъмэ  зэрафыщытми.Шъорыш1  хэлъми  къэпш1эщтэп. Ащ  фэдэ  ц1ыфым  бэ зэпичыщтэп, икупк1  шъыпкъэр  къыдэоещт. Ц1ыф шъырытэу  зыпкъ  ит  зэпытыр  зэк1ок1ырэп, и1эбак1эк1и, иплъак1и, ифыщытык1и зы. Ащ  фэдэм  уедэ1у  зэпыты  пш1оигъу, пэблагъэ  ухъунэу  уфай, плъэгъунэу  ук1эхъопсы охъу. Шэн-гъэпсык1э  дахэм  ащ  фэдэ  ц1ыфыр  къегъэдахэ, къэзыуцухьэрэмэ  къахегъэщы, зыш1эрэмэ  агу  дахэк1э  елъы, щысэ  тырахэу  мэпсэу.      Джары ,сэ  сиш1ошък1э, ц1ыфыр  зыгъэдахэу  къысщыхъурэр.Шэн-гъэпсык1э  дахэ  пхэлъмэ ц1ыфмэ  дахэк1э  уаш1эщт.