Сочинение обучающейся 8 класса «Гум щыгъупшэщтэп»

^{Сочинение}

^{Темэр: «Гум}

^{щыгъупшэщтэп»}

^{Зытхыгъэр:}

^{РА ,Тэхъутэмыкъое район}

^{Отраднэ гурыт еджап1эу №9}

^{ия 8-рэ класс ис еджак1оу}

^{Хъунэ Суанд}

^{К1элэегъаджэр: Ачмиз Мулиет Заурбечевна}

^{2021 илъэс.}

Гур зэплъэк1ыжьы. Тарихъым инэк1убгъохэр, сыгуч1э рахэу, к1эсэджык1ыжьы. Сыд фэдиз уахътэ блэк1ыгъэми, гум щыгъупшэщтэп л1эш1эгъу емынэм имэш1о топхэр. Зэо пстэур зэфэдэп. Урыс-Кавказ заор адрэ заоу хъишъэм къыхэфагъэмэ анахь мэхъэджагъ. Сэ а заом къежьап1э фэхъугъэр къэстхынэу мурад згъэуцурэп. Сиш1ош1ык1э, ащ ик1эух хэтрэ адыги ыш1эн фай. Ащ фэдэ зао къэмыхъужьыным и1ахьыш1у хиш1ыхьан фай. Жъоныгъуак1эм и 21-м 1864 илъэсым къушхьи, мэзи зэлъигъаджэу аужырэ о макъэр тич1ыгу щы1угъ. А мафэм, зэк1э адыгэу дунаим тетым, нэшхъэигъэр къяк1у, гукъэк1ыжь чыжьэмэ агухэр зэлъештэ.

Кавказым итарихъ зэзгъэш1эрэ ш1эныгъэлэжьэу Адольф Берже къытхыгъэмэ ащыщхэр щысэ къэсхьымэ сш1оигъу. «Ныбжьи сщыгъупшэнэп хы1ушъом щыслъэгугъэр.

Ос-ое ц1ынэм нэбгырэ мин пш1ык1ублыр егъэзыгъэу хэт. Узи, гъабли къатек1оу мин пчъагъэр пц1ымамэу зэхэт. Нэпкъым л1ыжъ-к1элэц1ык1у хьадэу итэкъухьагъэмэ хьэхэр ащэшхэх. Ныкъошх аш1ыгъэ къупшъхьэхэри олъэгъух. Адыгэ бзылъфыгъэ дахэу щылъым гур егъэузы. Ны хьадэу дыижьыгъэм голъ сабый ц1ык1ур шхэ ш1оигъоу мэгъы».

Кавказ заом джары ынапэр,

Псыик1ыжь гъогум джары ылъапэр,

Джары хьазабэу къэк1ыщтыр апэ

Шъхьэцышъо гъэтэдж- гуми фэщэчырэп.

Хъалыщ С.

Миллион хъурэ лъэпкъым щыщэу процентитф ны1эп къэнагъэр. Ар фэшъхьафэу къэп1он хъумэ, нэбгырэ т1ок1ым щыщэу нэбгырэ пш1ык1убгъумэ яч1ыгу абгынагъ. Ахэмэ ащыщыбэр хьэ е пцэжъые 1ус хъугъэх. Зыгу фэмыщэчэу хым зыхэзыдзэжьыгъэхэри къахэк1ыгъэх.

Пыидзэм ыгъэчъэгэ лъым тич1ыгу ыгъэшъок1ыгъ. Адыгэ л1ыхъужхэм янахьыбэр псэемыблэжьэу зэуагъэх. Ахэр арых адыгэм ыц1э дахэк1э зэрэдунай язгъэш1агъэр, лъэпкъ пстэуми такъыхэзгъэщыгъэхэр. Лъэшэу сыгу рихьыгъ Хъырцыжъ Алэм икъэбарэу сызэджагъэр:

«Шъуеплъ, ар зэрэзаорэм. Иплъак1э гукъаори маш1ори къызэрэпихырэм». Хъырцыжъ Алэм ыпсэ хэк1ы зэхъум, ыкъо къыри1ожьыгъэ гущы1эхэр:

Сэ къыск1эныжьыгъэ закъор л1ыблэнагъ-

Л1ыхъужъныгъэм нахь лап1э щы1эп.

Псыхъо чъэрыр пщагъом зэриухъумэу,

Л1эныгъэм сэ сынэхэр къызэтырелъхьэх».

Сыдэу згъэш1агъорэ Алэм л1ыгъи, гук1эгъуи, ц1ыфыгъэ мыухыжьи зэрэхэлъыгъэр! Пыим ылъ ыш1энжьынэу ек1угъэм идзэ е1ажэ Тхьэм къыгъэхъугъэхэр къыгъэнэнхэу. Джащ фэдэхэр ары л1ыхъужъ шъыпкъэхэр!

Адыгэ хабзэм ып1угъэ ц1ыфмэ ащыгъупшэщтэп абзи, яч1ыгуи. Ащ ишыхьат Косовэ, Сирием къик1ыжьыгъэ адыгэхэр. Ахэмэ джы к1элэц1ык1ухэр къафэхъугъэх, мэпсэух, мэлажьэх, абзэк1и шъхьафитэу мэгущы1эх. Фэзэщыгъэх ахэр тихэку ижьы 1эш1у, титыгъи, тиогуи, адыгэм ичэфы макъи. Лъэшэу сык1эхъопсы зэк1э адыгэу дунаим тетымэ къагъэзэжьынэу. Тич1ыгоу тянэр илъфыгъэмэ яжэзэ пшъыгъэ …

Кавказ заом фэгъэхьыгъэ зэ1ук1эу щы1агъэм Адыгэ Республикэм и Президентэу Тхьак1ущынэ Аслъан щыхигъэунэфык1ыгъагъ мамырныгъэмрэ зэкъошныгъэмрэ осэ ин зэрафэпш1ын фаер, ц1ыфыпсэр къэухъумэгъэным, псыхьэгъэным узэрэдэлэжьэн фаем. А гущы1эхэмэ ц1ыфым нахь былым дунаим темытэу къызгурагъэ1уагъ. Зэк1э Дунаим тет ц1ыф лъэпкъ пстэуми т1апэхэр зэрэтэжъугъэубыт! Тимурадыш1ухэр къыддэхъухэу,тына1э зэтетэу, хьалэлэу тич1угу тыщыжъугъэлажь!