Саналаштырма"Талебелер Янъы йылгъа азырлыкъ корелер".

Баш къараманлар: 10-15 талебе (огъланлар ве къызлар).Талебелер сыныфта отурып, чешит-тюрлю ишлер япалар.Кимиси телефонда ойнай, кимиси сакъыз чайнай, кимиси журнал окъуй,кимиси раледе юкълап къалды.

Сыныфкъа староста кире.

ТАЛЕБЕ 1: Сонъ? Мудир муавини не деди?

СТАРОСТА: 12 ай!

ТАЛЕБЕ 2:Ойле этип сёйледи: январь, февраль, март, апрель, май, июнь, июль, август, сентябрь, октябрь, ноябрь, декабрь?

СТАРОСТА: Ёкъ,бизим сыныфтан «12 ай» адлы спектакль япкъаныны сёйледи.

ТАЛЕБЕ  3: О масал не акъкъында? Ким биле я?

ТАЛЕБЕ 4: А! Онда насыл бир къызчыкъны огей анасы ормангъа, акъбардакъларны топламакъ ичюн, ёллады.

ТАЛЕБЕ 5: Ёё, мен ормангъа бармайджам. Онда мен не япаджам? Онда wi-fi да ёкъ…

ТАЛЕБЕ  6:  Ваай! Сен ананынъ къарнында 9 ай wi-fi -сыз наптынъ экен? Сабиий..

ТАЛЕБЕ 5: Бу омрюмнинъ энъ агъыр 9 айы эди…

СТАРОСТА: Шимди субетимиз 9 ай дегиль де, 12 ай акъкъында кете! Келинъиз роллерни болейик. Сиз ким оладжакъсынъыз?

ТАЛЕБЕЛЕР 7,8,9: Чур биз июнь,июль ве август оладжакъмыз!

СТАРОСТА: Я, не ичюн?

ТАЛЕБЕЛЕР 7,8,9: Бу яз вакъытты. Эв вазифелерни бермейлер.Окъув ёкъ.Бельки де, спектакльде сёзлерни эзберлемеге керек олмайджакъ.

ТАЛЕБЕ 10: Мен олесем сентябрь оладжам.Бу ай даа мектепке бармагъа истек бар.

ТАЛЕБЕ 11: Ойле олса, мен бу сценкада асылында иштирак этмейджем!

СТАРОСТА: (къызгъа): Сен орманда акъбардакъ топлайджанъ.Япарсынъ? Бу керчектен де агъыр бир вазифедир…