Кара -Кой жаратылыш паркы

Кара кой- жаратылыш паркы

Кара кой жайлоосу

• Ноокат районунун Кыргыз-Ата айыл аймагында өзгөчө жаратылышка ээ Кара-Кой жайлоосу орун алган. Кара-Кой жайлоосу Алай тоолорунун оң тарабынан башталат. Чыгыш тарабы Мазар, ал эми батыш тарабы Алтын-Бешик зоолору менен курчалган. Күн чыгыш тарабындагы тоонун түбүнөн эки бөлөк булактан таза суу чыгып, Кыргыз-Ата дарыясын түзөт. Ал тоонун түбүнөн чыккан сууну Суу-Чыкты деп аташат. Суу-Чыктынын күн чыгыш тарабындагы тоонун бети калың арча токой болуп, анын жогору жагы Кум-Бел деп аталат. Аталган белде ыйык деп эсептелген Мазар үнкүрү бар. Ошол себептен жалпысынан ал жер Кызыр-Ата-Мазар жайлоосу деп аталып калган.

• Мазар жайлоосунан дарыяны бойлоп төмөн түшкөндөгү маңдай беттеги зоонун боорунда байыркы тарыхты каткан Кыз-Коргон аталган табигый таш коргон бар. Анын айланасы таштуу аска менен курчалып, ичинде карагай, кайың, арча өсөт.
• Ал коргондо чоң үнкүр жайгашкан. Байыркы заманда жоо келип, айылды өрттөп, мал мүлктү талап, жигиттерди туткундап, кыздарды олжолоп турганда тукум курут болбойлу деген ата-бабалар кыздарын ошол үңкүргө жашырышкан деп айтылат.

Андан ылдыйлаганда, Мазар менен Кара-Койдун сууларынын бириккен жери Чат деп аталат. Чаттан жогору Мурдарчы, Алтын-Бешик деп аталган зоолор бар. Андан кийин Калдай, Берки-Суу, Кураган, Булалык, Курак-Тектир, Соң-Кыштоо, Шамшили, Эчки-Атар, Жастокой, Шибели жана башка айылдар жайгашкан. Жаратылышы кооз Кара-Койдо арчалар жыш жайгашкандыктан, «карап кой» деген сөздөн алынып, Кара-Кой деп аталып калган дешет. Өрөөндүн этек жагы кенен жайытка чыгышат. Кыргыз-Ата айыл аймагына Кыргыз-Ата, Ак-Булак, Көтөрмө жана Борко айылдары жайгашкан кооз аймактар кирет.