Просмотр содержимого документа
«Անչափահաս իրավախաղտներ»
Անչափահաս իրավախախտներ
Օրինակ 1.
Անչափահաս աղջիկը 16 տարեկան է: Սովորում է դպրոցում, ունի լավ առաջադիմություն և վարք: Նրան ճանաչում են որպես ամաչկոտ, շատ համեստ և օրինակելի աշակերտ: Ապրում է մոր և իրենից 2 տարով մեծ եղբոր հետ: Հայրը մահացել է մի քանի տարի առաջ: Ընտանիքն ունի ֆինանսական խնդիրներ: Մայրը չի աշխատում, իսկ նպաստը չի բավականացնում: Մորաքույրը մեծ ազդոցությու ունի ընտանիքում, քանի որ նաև օգնում է նյութապես: Մայրը տխուր, չափազանց պասիվ անձնավորություն է: Աղջիկը սիրահարվում է եղբոր շրջապատից մի երետասարդի: Զգացմունքը լինում է փոխադարձ: Ընտանիքը, հատկապես մորաքուրը դեմ են լինում այս կապին: Աղջիկը տառապում է երիկամային հիվանդությամբ: Խրոնիկ հիվանդություն ունի նաև տղան: Աղջկա մորոքույրը դիմում է ոստիկանություն բացատրելով, որ աղջիկն ունի իրավախախտ վարք և տանից դուրսէ գալիս առանց թույլտվության, ինչպես նաև հիշատակում է երիտասարդի համար, ով պարզվում է, արդեն հաշվառման մեջ է գտնվում: Ոստիկանության Անչափահասների հարցերով բաժանմունքից աղջկան բերում են վերականգնողական կենտրոն, որպես իրավախախտ:
Խնդրում ենք կարդալ և քննարկել այս դեպքը: Որն է անչափահասի կողմից կատարած իրավախախտումը: Ինչպիսի վերականգնողական պլան կարող եք մշակել այս դեպքի համար:
Օրինակ 2.
Անչափահաս տղան 16 տարեկան է: Ընտանիքը բաղկացած է 4 անձից` հայրը, մայրը, դպրոցահասակ քույրը և ինքը: Մայրը և հայրը չափազանց նվիրված են և աշխատասեր: Մայրն աշխատում է առավոտից մինչև երեկո, որպես հավաքարար, իսկ հայրը կատարում է սեզոնային գյուղատնտեսական աշխատնքներ: Ստացվել է, որ ամենադժվար տարիքում տղան ինչ-որ չափով դուրս է մնացել ծնողական ուշադրությունից: Նա ունի բավականին ակտիվ դեռահասի հեղինակություն իրենց թաղում և կարողանում է ներգործել այլ հասակակիցների վրա: Անչափահասը ավարտում է միջին դպրոցը և ծնողների համաձայնությամբ գնում է սովորելու ավտոմեխանիկի գործը մասնավոր վարպետի մոտ: Ստացվում է այնպես, որ վարպետի և տղայի հարաբերություններ դառնում են կոնֆլիկտային: Դեռահասը մի շարք կոնֆլիկտներից հետո որոշում է վրեժ լուծել վարպետից: Իրենց թաղի մի քանի տղաների հետ նա կազմակերպում է գողություն այն գարաժից, որտեղ ինքը սովորում էր ավտոմեխանիկի գործը: Նա վաղուց էր հետևել և գիտեր թե վարպետը որտեղ է պահում ավտովերանորոգումներից ստացած վճարները:
Տեղի է ունենում դատ և անչափահասը դատապարտվում է 2 տարվա ազատազրկման: Այս ամենին զուգադիպում է հանրապետական իշխանությունների կողմից հայտարարված ամնիստիան և նա զատվում է: Գալիս է վերականգնողական կենտրոն:
Խնդրում ենք կարդալ և քննարկել այս դեպքը: Որն է անչափահասի կողմից կատարած իրավախախտումը: Ինչպիսի վերականգնողական պլան կարող եք մշակել այս դեպքի համար:
Օրինակ 3.
Անչափահասը 17 տարեկան տղա է: Մեծացել է բարեկեցիկ և ապահով ընտանիքում: Ծնողները ուսուցիչներ են: Հայրը նաև հարգված անձնավորություն է և երկար տարիներ աշխատել է ամենամեծ դպրոցներից մեկում որպես տնօրեն: Ընտանիքը բաղկացած է 4 անձից` հայրը, մայրը, մեծ եղբայրը և ինքը: Տղան իր տարիքից շուտ ավարտելով դպրոցը հաջողությամբ ընդունվել է բարձրագույն ուսումնական հաստատություն: Եղբայրը բանակում է ծառայում: Ծնողները շատ խիստ են և պահանջկոտ: Առանձնապես մտերիմ է եղել հորական տատի հետ, որը մահացել է 2 տարի առաջ: Տղան ունի դժվար հարաբերություններ ծնողների, հատկապես` մոր հետ: Անվստահությունը և կասկածամտությունը անչափահասի նկատմամբ դառնում է անտանելի: Ծնողների չափազանց խստապահանջությանը նա պատասխանում է դասերից խուսափելով և տարօրինակ պահվածքով: Նա գնում էր ինչ-որ տեղ և չէր ասում ծնողներին: Մի օր էլ սեղանին է թողնում իր նամակը այն մասին, որ ուզում է հեռանալ ընդմիշտ: Տանից դուրս է գալիս իրենց շենքի դիմացի տաղավարում նստում է մինչև ուշ գիշեր: Մայրը գնում է ոստիկանություն և բողոք է ներկայացնում, որ տղան փախել է տանից: Տղային ուղղորդում են վերականգնողական կենտրոն:
Խնդրում ենք կարդալ և քննարկել այս դեպքը: Որն է անչափահասի կողմից կատարած իրավախախտումը: Ինչպիսի վերականգնողական պլան կարող եք մշակել այս դեպքի համար:
Օրինակ 4.
Անչափահասը 14 տարեկան տղա է: Ապրում է թոշակառու ծնողների հետ, ովքեր ունեցել են իրենց ընտանիքները, հետո տարբեր պատճառներով ամուսնալուծվել և ուշ տարիքում ամուսնացել են: Ապրում են չափազանց աղքատ: Հայրը նաև հաշմանդամ է: Տղայով համարյա թե չեն զբաղվում: Մայրն ունի ազգականներ Ռուսաստանի Դաշնությունում և հաճախ է գնում գումար վաստակելու:Այդ ընթացքում հայրը /ով նաև չարաշահում է ալկոհոլը/ մնում է որդու հետ մենակ: Տան գործերը, ուտելիքի պատրաստումը, հիգիենայի հարցերը մնում են բարձիթողի վիճակում: Տղան փորձում է անել այն ինչ կարողանում է: Անչափահասը դպրոցում վատ է սովորում: Ուսուցիչները դժգոհ են նրա ակտիվ վարքից այն նկարագրելով, որպես դասերը խանգարել, անտեղի աղմկել, կատակել: Թաղում ունի շատ ընկերներ և օրվա մեծ մասն անցկացնում է փողոցում:Մի օր էլ իր երկու ընկերների հետ ծեծում է իրենց թաղի հաշմանդամ երեխային, պատճառաբանելով, որ իրեն չի լսում: Վերջինիս ծնողները դիմում են ոստիկանություն: Անչափահասների բաժանմունքում հաշվառման վերցնելուց հետո ոստիկանները ուղղորդում են վերականգնողական կենտրոն:
Խնդրում ենք կարդալ և քննարկել այս դեպքը: Որն է անչափահասի կողմից կատարած իրավախախտումը: Ինչպիսի վերականգնողական պլան կարող եք մշակել այս դեպքի համար:
Օրինակ 5.
Տղան 13 տարեկան է: Ապրում է մոր և եղբոր հետ: Հայրը մեկնել է արտագնա աշխատանքի: Ընտանիքը գոյատևում է հոր ուղարկած գումարներով: Դպրոցում լավ չի սովորել և դրսևորել է իրավախախտ վարք: Մշտապես կատարել է գողություններ /տետր, գրիչ/ սակայն մոր միջամտությամբ ինչ-որ կերպ լուծվել են հարցերը: Միջին դպրոցը ավարտելուց հետո ընդունվում է արհեստների ուսումնարան: Մի անգամ իր մի քանի ընկերներին համոզում է գնալ գյուղ իր տատին օգնելու: Դասերից հետո գնում են գյուղ տատի տուն: Ընկերներին ասում է, որ բռնեն հավին ու կերեկուր պատրաստեն, քանի որ իր տատի հավերն են: Ընկերները բռնում են հավին մորթում են և ուտում: Հարևանը բացահայտում է տեղի ունեցածը և դիմում է ոստիկանություն: Իրականում մինչև վերջ ընկերները համոզված են եղել, որ կերել են իրենց ընկերոջ տատի հավերին: Բոլորը անակնկալի են գալիս: Անչափահասը ուղղորդվում է համայնքային կենտրոն: Համայնքային կենտրոնում ևս կատարում է գողություն:
Խնդրում ենք կարդալ և քննարկել այս դեպքը: Որն է անչափահասի կողմից կատարած իրավախախտումը: Ինչպիսի վերականգնողական պլան կարող եք մշակել այս դեպքի համար:
Օրինակ 6.
Տղան 14 տարեկան է: Ապրում է մոր հետ, քանի որ հայրը և ավագ եղբայրը գնացել են արտագնա աշխատանքի: Դպրոցում լավ է սովորում: Հարգված է և ունի լավ աշակերտի համբավ: Մայրը հավաքարար է, սակայն միշտ ուշադիր է և հետևողական: Կապված է մորական պապի հետ, որը մի քանի ամիս առաջ հիվանդացել է և ընկել անկողին: Մայրը և քեռու ընտանիքը միշտ կոնֆլիկտներ են ունեցել: Մայրը ցանկացել է իր հորը խնամել, սակայն քեռու կինը արգելել է: Տղան համառությամբ փորձել է երեկոյան ներկա լինել և տեսնել թե ինչ վիճակում է իր պապը: Նկատել է, որ պապին լավ չեն վերաբերվում և խնամում: Փորձում է պապի շահերը պաշտպանել, սակայն քեռու կինը և քեռին նրան վռնդում են իրենց տանից և արգելում են այցելել: Մի քանի օրից տղան կոտրում է քեռու տան ապակիները: Քեռու կինը դիմում է ոստիկանություն: Հաշվառման վերցնելուց հետո տղային ուղղորդում են վերականգնողական կենտրոն:
Խնդրում ենք կարդալ և քննարկել այս դեպքը: Որն է անչափահասի կողմից կատարած իրավախախտումը: Ինչպիսի վերականգնողական պլան կարող եք մշակել այս դեպքի համար:
2