«А. Бадмаев и его «Голубоглазая каторжанка» - эссе в поэтической форме – автор Даваева Г. Л.

«Алексей Бадмаев и его «Голубоглазая каторжанка» - эссе в поэтической форме – автор Даваева Г. л.

«Бадмин Үкрчǝ болн хальмгудын хөв хувалцсн орс берин тууҗ» - шүлглǝнǝ янзар шинҗлҗ бичсн ахр нǝǝрүллһн (эссе)

Нертǝ бичǝчин уханд

Кесг тоолвр орла.

Молотовин ГЭС-ин түүрмд

Җирһлин учр хǝǝлǝ.

Орс хальмгин иньгллтиг

Йилһҗ үүдǝвртǝн бичлǝ.

Баахн берин зовлңгиг

Эврǝннь нүдǝрн үзлǝ.

Хальмг көвүн дуран

Орс күүкнд нерǝдлǝ.

Баһчуд халун цусан

Нег-негндǝн дурдла.

Һазр чичрүлсн зǝңг

Хулуста селǝнүр ирлǝ.

Өршǝңһү уга маңһс

Цагин гүүдл зогсала.

Падрсн дǝǝнǝ һалд

Церн Төрскǝн харсла.

Бар сарин хөрн нǝǝмнд

Хальмгудыг авад һарла.

Бууһин хундгар чичǝд

Малын вагонд ачла.

Орс бер күүкдǝн дахулад

Хальмгудта хөвǝн хувала.

Улан ширтǝ вагон

Дорд үзгүр темцв.

Нүүрснǝ хар утан

Өвкнрин нар халхлв.

Өңгрсн күүнǝ цогциг

Чирǝд вагонас хайв.

Ишкрсн салькна дууг

Уйдҗ Алла соңсв.

Җирһлин үн хǝǝһǝд

Орс бер туугдла.

Дуран өмнǝн тǝвǝд

Өрк-бүлǝн харсла.

Хальмг нерǝн сольтха гиҗ

Кесг дǝкҗ закла,

Шудрмг күүкн зөрҗ

Тедниг өмнǝснь харала.

Өөрдин йосар бǝǝҗ

Хальмг кел дасла.

Эңкр теегǝн санҗ

Өвкнрин авъяс тевчлǝ.

Олн ǝмтнǝ иньгллт

Диилврин өдр өөрдхв.

Кишг дурдсн байрт

Йиртмҗин бǝǝдл орлцв.

Дурта Церн ирҗ

Күүкнǝ зүрк байрлулв.

Чееҗин зовлң баһрулҗ

Берин омг өөдлүлв.

Зурсн зураһан эдлҗ

Хальмгуд Сиврт бǝǝв.

Төмр хаалһ дахҗ

Кесгнь цаснд үлдв.

100 миңһн хальмгуд

Цусн нульмсан хольла.

У седклтǝ орсмуд

Өдмг-хувцарн хувалцла.

Иим ǝǝмшгтǝ аюлыг

Кен эртǝснь белдсмб?

Һашута җирһлин зовлңгиг

Кен халурхҗ баһрахмб?

Ах үйнрин тачалыг

Кен эвлҗ девтǝхмб?

Уршг уга килнциг

Кен урсхаҗ дархмб?

Иим олн сурврмуд

Күүнǝ чееҗ үүмүлнǝ.

Өвкнрин йөрǝлд багтҗ

Баһчуд Төрскǝн делгрүлнǝ.

Сарул хаалһ дурдҗ

Ээҗ-аавнр зүтклǝ.

Ухан- седклǝн негдүлҗ

Кишгтǝ иргч белгллǝ.

Бичǝчин җирһлин хаалһд

Сивр – зүркнǝ өвдкүр болв.

Хальмгин нер будснд

Үкрчǝ икǝр һундв.

Зөв уга йовдлыг

Кен чигн мартшго.

Харалта нүүлһнǝ җилиг

Күүнǝ ухан геедрүлшго.