Өтөлгөлүү өмүрдүн бир күнү

Адамга күн сайын таң эртеден туруп, түркүн куштардын кубулжута сайраган жагымдуу үндөрүнө кулак төшөп, таза абадан кере-кере дем алып, эс алган дене боюңду кыймылга келтирүү үчүн жеңил көнүгүүлөрдү жасап, айлана чөйрөгө кумарлануу менен көз чаптырып, көк асмандагы каалгып бараткан ак булуттарды карап, дагы бир бактылуу күндүн таңынын ээси болгондугуна тан берүү кандай зор бакыт! Ушул кутмандуу таңды, жылуу саламың менен эң жакын адамдар менен бөлүшүү, ошол бакыттын бутактары, ал эми ширин сөздөр, каалоо-тилектер анын мөмөсү экенин ар бирибиз таназарыбызга ала бербейбиз деле. Ушул күндү жараткан аллага шүгүр айтуу менен, күндү ачык маанай, көтөрүңкү көңүл, ишке болгон чыгармачылык эргүүң, көз алдыңа тартылган ой-максаттарыңа жетүүгө болгон умтулуу сезимдериң дал ушул таң эртеден башталып, күн бою жумуштарын менен алектенип, түркүн адамдар менен баарлашып, турмуштун чаарпалегиндей айланган көр тириликтин жетесинде жүрүп, анан кантип кеч киргенин да аңдабай калып, кечинде жумуш бүткөндө, бүгүнкү өткөргөн күнүңө кээде сарасеп салып, кээде жөн гана өткөрүп жибересиң го, чиркин дүйнө.