Ой гүлдөрүнөн бир шиңгил "Ширин сөздүүлүк баяны"

"Жылуу, жылуу сүйлөсө, Жылан чыгат ийинден" (эл макалы).

Ким болсо эгер чебер сөздүү, акылман,

Барган жерге үрөн себээр акылдан.

Уулум, курч сөздүүлүк, кепке чечендик өзүнчө баалануучу эң мыкты сапаттар. Дайыма жагымдуу, ачык так мазмундуу, маанилүү сүйлөөгө үйрөнгүн. Жалган сүйлөөгө жатыкпагын, өзүңдү чынчылдык аты менен элге даңаза кыла билгин.

Чыныгы акылдуу, даанышман адам бир маселе тууралуу сүйлөмөкчү болсо, ал маселенин төркүнүнөн толук кабардар болуп, эмне дээрин алдын ала терең ойлонуп туруп, андан соң ачык, даана, мазмундуу сүйлөй билет. Түркөй адам эч нерсеге түшүнбөйт, ал эмне дегенин өзү аңдабайт.

Уулум, эгерде бир адамдын кемчилигин сезип, ага насаат айтмакчы болсоң, оболу анын табиятын, руханий чама-чаркын жакшылап текшерип, андан соң насаатыңды айткын. Болбосо айткан насаатың сая кетет..