Карантин учурундагы азык-түлүктөр, алар сакталган жайлар жана аларды сатуучулар санитардык жана гигиеналык талаптарга жооп беришеби?

Бүткүл адамзатты түйшүккө салган Covid-19дан катуу, жарым-жартылай же эми таркап баштаган, алардан жабыркаган өлкөлөрдө карантин ар түрдүү деңгээлде ишке ашырылып жаткандыгын күн сайын жалпыга маалымат берүү каражаттарынан угуп, көрүп жатабыз. Ошол эле учурда азык-түлүк дүкөндөрү штаттык режимде жалпы калкты күндөлүк керектелүүчү буюмдардан тартып, азык-түлүктөргө чейин сатылып, тейлөө улантылып жаткандыгын билебиз. А бирок, ошол сатылып жаткан тамак-аш, азык-түлүктөрдүн бааларынын көзөмөлдү мындай коюп, алардын канчалык деңгээлде санитардык жана гигиеналык талаптардын негизинде сатылып жаткандыгына кооптонуу менен байкоо салышыбыз абзел. Атап айтканда, тириликтин айынан колунда жеке унаалары бар, колунда запас топтогон акчалары бар, убактылуу майда жеке ишкерлердин саны күндөн-күнгө көбөйүп баратат. Алар бир жерден экинчи жерге калк аралап, соода-сатыктарын да жүргүзүп келе жатат. Алардын алып келген, дүкөндөргө таркатып жаткан товарларынын санитардык, гигиеналык жактан канчалык талапка жооп бере турган кагаздарын сураштын ордуна, биз анын наркына биринчи кызыгып, суроо узатабыз. Ушундай кырдаалдарда санэпидборборлордун жетекчилери, кызматкерлеринин аткарган кызматы эң жогору, жоопкерчиликтүү болуш керек. Муну ар тараптан көзөмөлгө алуучу органдар деле карантинде олтургандай туюлат. Албетте, кудай өзүң сактансаң, өзүм сактайм дегендей, ар бирибиз өзүбүзгө сак болуубуз керек. Ушул күндөрдө пайда болуп жаткан аталган жаман илдетти жугузуп алгандар, ушул кезге чейин ошол эле элдер барган азык-түлүк дүкөндөрүнө барган же барбаганына ким кепилдик бере алат. Маселенин негизи өзөгү мына ушунда болуп жатат.