Բ ա՜ ր և, -
Քե՛զ
Ու
Ձե՛զ,
Ծանո՜թ-անծանո՜թ իմ սիրելիներ:
Թո՛ղ անկարելին դառնա կարելի
Աշխարհո՛ւմ համայն,
Ամենքի՛ս համար,
Դառնա կարելի վաղն ու հենց հիմա,
Դառնա կարելի մե՛կ բառով՝
- Բ ա՜ ր և...
Այսօր սեպտեմբերի 1-ն է, գիտելիքի և դպրության օրը, պետական տոն, նոր ուսումնական տարվա առաջին օրը։ Գիտելիք, որը հազարամյակներ շարունակ եղել է մեր ժողովրդի գերագույն արժեքներից մեկը:
Այսօր բոլորիս համակել է անասելի մի ուրախություն: Մեր սիրելի դպրոցը նորից իր գիրկն է առել հարյուրավոր երեխաների, լցվել նրանց զրնգուն ծիծաղով, ուրախությամբ ու հրճվանքով:
Այսօր կրկնակի տոն է այն վեց տարեկանների համար, ովքեր կրթական կյանքի նոր փուլում են, ովքեր առաջին անգամ պետք է ոտք դնեն դպրոց:
Ուշադրությո՜ւն. ծափողջյուններով հրապարակ ենք հրավիրում առաջին դասարանցիներին և դասվար Ե. Մանուկյանին:
Հրանտ-1-ին դաս.
Տոն է այսօր խնդություն
Քաղցրահնչյուն երգն է կանչում
Հոգեվարար այդ կանչի մեջ
Մեր ողջույնի երգն է հնչում:
Այն հնչում է մանուկների արդար կանչով
Մեր սրտերի դողդոջ զարկով
Այն հնչում է, որպես մեծ հույս
Որպես սկիզբ, մտքի աղբյուր
Հոգու զանգակ մեր տենչալի:
Կրկին եկավ Սեպտեմբերը
Իր հետ բերելով գիտելիքի տոնը
Այս տոնն իր հետ բերում է
Բարություն, ուրախություն և հավատ ապագայի նկատմամբ:
Այսօր նոր ուսումնական տարվա սկիզբն է
Եկել է նոր ու հետաքրքիր հանդիպումների ժամանակը
Գիտության չբացահայտված մոլորակների հետ:
Եկավ Մեկը Սեպտեմբերի,
Որ գիտության սերմը բերի
Մեր ուղեղի պարարտ հերկին,
Ուշիմ ու լուրջ ամեն մեկին:
Գիտությունը մտքիդ ուժն է,
Իմաստության թասն ու կուժն է,
Կարդա', սերտի'ր, եղի'ր ուշիմ,
Երթ, ընթացք տուր մտքիդ ուժին:
Դա քո գանձն է հավերժ հոսող,
Քո գալիքն է առանց ոսոխ:
Գիտությունը կամքի գետ է.
Պարտվում է նա, ով տգետ է:
Կա դարերից եկած մի ասք.
«Տգետ մարդիկ – տգետ մի ազգ»:
Դպրոց եկար – եղիր ուշիմ,
Նոր սխրանք տուր մտքիդ ուժին:
Կեցցե' Մեկր Սեպտեմբերի՝
Իմաստության սերմը բերրի :
Հարազատ մեր դպրոց
Կրկին ասում ենք
Ողջու՜յն, ողջու՜յն…
Դու ջահ անմար՝ մեզ ուղեկից,
Քեզ հավերժ փառք, հազար ողջույն:
Այսօր բոլորս սրտանց շնորհավորում ենք մեր վեց տարեկաններին, ովքեր իրենց փոքրիկ քայլ են կատարում կրթության բազմաբովանդակ աշխարհ:Կրթությունն այն միակ միջոցն է, որը կտա ձեզ ապահով հայրենիք և արժանավայել կյանք:
Ահա եկավ առաջին խորհրդանշական զանգը հնչեցնելու պահը;
– Մեզ հետ բերել ենք զանգն այս խորհրդանշական, որ հանձնենք Ձեզ, սիրելի՛ տիկին Հարությունյան:
Սիրելի՛ տիկին Հարությունյան, սեպտեմբերյան այս գեղեցիկ օրվա խորհուրդն առանց Ձեր խոսքի և մաղթանքի մեզ համար չի կարող լիակատար լինել: Մենք սիրով և ամենայն ուշադրությամբ ուզում ենք լսել Ձեզ, և որպես մեր դպրոցի տնօրեն հնչեցրեք նոր ուսումնական տարվա սկիզբն ազդարարող զանգն առաջին:
Տնօրենի ուղերձ: