Համո Սահյանն իմ հայրենակիցն է
Կծիկ-կծիկ սարեր, կիրճեր պարան-պարան
Շարան-շարան ժայռեր, քարափ ու քերծ,
Վերհուշերս կրկին, ա՜խ, ինձ անյտեղ տարան,
Լեռնաշխարհը տարան այն երկնամերձ:
Ամեն անգամ երբ հարկ է լինում խոսել ծննդավայրիս՝ Լորի մասին,նշել լորեցի լինելու փաստը,ճախրող ուրախությունը պարուրում է հոգիս. չէ՞ որ ես հայրենակիցն եմ մեծն բանաստեղծ Համո Սահյանի:
Ապրում եմ նույն ափաչափ գյուղում,ուր երկնքի կապույտում երգ են առնում արտույտ ու ծիծառ, ուր ծիածանի ցոլքում հող ու քար անձայն , անբարբառ պատմում են անցած գնացած, իմաստուն ու լի Լորի պատմությունը: Վաղորդյան ժամերին արթնանալով` շնչում եմ նույն պաղ օդը՝ հայացքս հառած խստաշունչ լեռներին, որոնց գագաթները կորչում են լուրթ երկնքում, ականջ եմ դնում Լորագետի ձայնին և իմ հպարտության ու ակնածանքի ձոնն եմ ուզում հղել այդ կարկաչի միջոցով: Թող մեր փոքրիկ գետակը իմ խոհերը տանի և հասցնի քարափների երգչին, ինչպես մի ժամանակ իր սերն էր տանում ջաղացպանի աղջկան: Ավելի քան համոզված եմ՝ բանաստեղծը զգում է , որ հիշում ենք նրան ամեն րոպե, տեսնում ենք նրա շունչը ամեն մի ժայռաբեկորի կարմրին տվող մասրենու , բացվող նարգիզի բույրի մեջ և Լորագետի ափին՝ կապտին տվող երկչոտ դաղձի ծաղկի մեջ ու թվում է ՝ մաքրություն է պատարագվում հայրենիքիս գողտրիկ անկյունում՝Լորում: Եվ սիրտս գնում է բարձունքից բարձունք, ընկնում՝ ոտքիս տակ, ամեն քայլիս թվում է, թե բանաստեղծի մանկության մասունքն է ընկնում:
Երբ բարձրաձայնում ենք բանաստեղծի անունը , թվում է՝ հովը երգ է շրշում, քամու շուրթին անգամ հով կա անսպառ, երգ կա անգամ առվի շուրթին, երգ կա և՛ճախրող լորի, և՛ եղնիկի հայացքում:
Երբ իմ հոգու պատուհանը գարնան քնքշանքով մեղմ թափանցեց Սահյանի պոեզիան՝ ես հրճվեցի հրճվանքով մաքուր:
Հաճախ է հոգիս ճախրում այն վայրերով, ուր խայտաբղետ կածաններ են, ձյունագես գագաթներ, ուր ծարավներ հագեցնող աղբյուր- զավակներ են, ուր թագավորում է մի խաչված գեղեցկություն, ուր անցել է իմ մանկությունը:
Երբ երկնքում Լորի վառվում է արփին, երբ խենթ վրնջում է քամին ծալ-ծալ կուտակված ձորերեում թև են առնում անհոգ, լուսե երազանքները, խաթարվում է ասես աշխարհին ծորացող լռությունը:
Այսօր ապրում, արարում է լորեցին՝ մշտապես զգալով հանճարի շունչը, աղոթքը, մշտապես քայլելով Սահյանի հետքերով, իսկ հայոց հանճարը ինչպես սրաթև արծիվ շարունակելու է սավառնել Հայաստան- հայրենիքիս մի պատառիկի՝ Լորի երկնքով, ճախրելու է և իր արմատներն է ձգելու հայ հանճարների ոսկե անդաստանով:
Արձագանքներդ խոր ձորերի մեջ,
Անդունդների մեջ թող որոտան,
Շառաչիր, կանչիր,սլացիր անվերջ,
Ա~խ,արար-վարար իմ Որոտան:
Հ.Սահյան
100 տարի է անցել, բայց յուրաքանչյուր հայ Սահյանով ապրել է , շնչել է, թեկուզ և անգիտակցաբար:Սահյանը ծնվեց, որ գյուղ հասկացողությանը էլ ավելի մեծ թևեր տա:Ծնվելով փոքրիկ սարերի ու կանաչերի մեջ ծվարած մի գյուղում` նա սկսեց հարստացնել գյուղը իր տեսանկյունից` տալով գույներ, երանգներ,գյուղին շունչ տվեց :Կարծում եմ յուրաքանչյուր մարդ, ով ծանոթ է Սահյանի գրչին համամիտ կլինի այն մտքի հետ, որ նա եկավ ու հոգի տվեց բնությանը:
Լորը նրա համար ներշնչանքի աղբյուր դարձավ,նրա ստեղծագործությունների համար կարևոր դեր ունեցան գյուղի առօրյան, տարեցները, մասրենին, դաղձը,Տատնա սարը,Որոտանի Եզերքը,Գյազբելա սարը:
Ամեն անգամ Սահյանից խոսելիս հպարտորեն գլուխս վեր եմ պահում, որ նման հայ, նման համագյուղացի ու մեծատառով մարդու հետ նույն օդն ենք շնչել, նույն ջուրը խմել: Սահյանը Լորին էլ ճանաչում տվեց, շատերը ոգեշնչված նրա ստեղծագործությունների նկարագրությունից ցանկացան տեսնել Լորը, տեսնել սահյանական նկարագրությունը ,սարերն ու ձորերը,Լորագետն ու բնությունը: Շատերն էլ վար ու ցան անելիս քթի տակ Սահյանի տողերից են ասում:Թեկուզ ֆիզիկապես նա մեզ հետ չէ, բայց հոգեպես յուրաքանչյուրիս մեջ է, ու ինչքան էլ ապրենք պետք է փորձենք Սահյանի շունչը տարածել, որպեսզի հավերժ հիշվի:
Լուսնի վրա տուն ու այգի,
Մարսի վրա գահ ունենա,
Ուր էլ մնա, ինչ էլ անի,
ՀԱՄՈ ՍԱՀՅԱՆՆ ԻՐ ԼՈՐԻՆՆ Է:
Կարծես ժամանակը ոչինչ չի փոխել, և 100 տարի անց ես զգում եմ նույն շունչը, ինչ զգացել է մեծ բանաստեղծը: Այսօր այդ շնչով է ապրում յուրաքանչյուր լորեցի, քանզի նա հպարտ է, որ ունի Սահյան…
Սահյանը միշտ մերն է և միշտ գնալու ենք Սահյանի հետքերով:
Եթե մինչև անգամ
Լսած լինես, թե ես այս աշխարհում չկամ,
Միևնույն է, կգամ, ինչ էլ լինի, կգամ,
Ուր էլ լինեմ, կգամ: